ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានគូសបញ្ជាក់ពីសារសំខាន់នៃការកសាងសហគមន៍ដែលមានវាសនារួមគ្នានៃសន្ដិភាព និងវិបុលភាព ក្នុងចំណោមប្រទេសមេគង្គ-ឡាងឆាងឱ្យកាន់តែប្រសើរឡើង ដោយគាំទ្រចំពោះ ខ្សែក្រវ៉ាត់អភិវឌ្ឍន៍សេដ្ឋកិច្ច។
សម្ដេចធិបតីថ្លែងបែបនេះក្នុងកិច្ចប្រជុំកំពូលកិច្ចសហប្រតិបត្តិមេគង្គ-ឡាងឆាងលើកទី៤ ដែលរៀបចំដោយប្រទេសមីយ៉ាន់ម៉ា សហប្រធានជាមួយប្រទេសចិន កាលពីថ្ងៃទី២៥ ខែធ្នូ ឆ្នាំ២០២៣ តាមប្រព័ន្ធវីដេអូពីចំងាយ។
សម្ដេចធិបតីបានលើកឡើងថាការអភិវឌ្ឍន៍ដែលផ្ដោតលើប្រជាជន និងពង្រឹងខ្សែច្រវ៉ាក់ផ្គ់តផ្គង់ក្នុងអនុតំបន់និងការតភ្ជាប់ទៅនឹងខ្សែច្រវាក់តម្លៃសកល តាមរយៈការពង្រឹងការតភ្ជាប់ក្នុងតំបន់និងកិច្ចសហប្រតិបត្តិការផ្នែកឧស្សាហកម្ម ព្រមទាំងជំរុញសេដ្ឋកិច្ចឌីជីថលនៅក្នុងកិច្ចសហប្រតិបត្តិការសេដ្ឋកិច្ចឆ្លងដែននិងភាពប្រកួតប្រជែងរយៈពេលវែងក្នុងតំបន់នឹងជួយជំរុញដល់ក្ដីសង្ឃឹមពីការកសាងសហគមន៍វាសនារួមគ្នានៃសន្ដិភាព និងវិបុលភាពក្នុងចំណោមប្រទេសមេគង្គ-ឡានឆាងបាន។
កិច្ចប្រជុំនេះបានបញ្ចប់ទៅកាលពីថ្ងៃទី២៥ ដោយបានអនុម័តនូវឯកសារសំខាន់ៗចំនួន៣គឺ សេចក្ដីថ្លែងការទីក្រុងណៃពិដោ ផែនការសកម្មភាពប្រាំឆ្នាំស្ដីពីកិច្ចសហប្រតិបត្តិការមេគង្គ-ឡាងឆាង (២០២៣-២០២៧) និងគំនិតផ្ដួចផ្ដើមរួមស្ដីពីការអភិវឌ្ឍច្រករបៀងនវានុវត្តន៍នៃកិច្ចសហប្រតិបត្តិការមេគង្គ-ឡាងឆាង ដែលឯកសារទាំង៣នេះនឹងរួមចំណែកដល់ការអភិវឌ្ឍបន្ថែមទៀតក្នុងតំបន់៕
